Չինաստանի Սանյա քաղաքում այս օրերին ընթանում է 68-րդ «Միսս աշխարհ» գեղեցկության մրցույթը: Մրցույթին մասնակցում է 120 աղջիկ, որոնցից միայն 30-ին է վիճակված հայտնվել եզրափակչում: Եզրափակչի ուղեգիր աղջիկներից 15-ը կստանան՝ մասնակցելով մինչ մրցութային օրը՝ դեկտեմբերի 8-ը անցկացվող տարբեր փուլերին: Հայաստանը ներկայացնող, «Միսս հայուհի 2018» Արենա Զեյնալյանը առայժմ չի հաղթահարել դեպի եզրափակիչ տանող փուլերից որևէ մեկը:

Tert.am Life-ի հետ զրույցում Արենան մանրամասներ է պատմել մրցութային ընթացքի մասին ու խոսել իր տպավորություններից:

Մրցույթի շրջանակում եզրափակչից առաջ անցկացվում են տարբեր մրցույթներ՝ «Թոփ մոդել», «Տաղանդ», «Մուլտիմեդիա», «Սպորտ», «Գեղեցկությունը նպատակի համար» և «Head to Head Chalange»-ը, որոնց հաղթողները ստանում են եզրափակչի ուղեգիր, իսկ մնացած մասնակիցներին ընտրում է ժյուրին: Արենան նշեց, որ մասնակցել է «Թոփ մոդել», «Սպորտ» «Head to Head Chalange» փուլերին: Ի դեպ, վերջինիս հաղթողը որոշվել է օնլայն քվեարկության արդյունքներով: Chalange-ում 120 մասնակիցը բաժանվում է 20 խմբի՝ 6-ական հոգով: Նրանք տեսանյութերով ներկայացնում են իրենց երկիրն ու պատասխանում հարցերին: Յուրաքանչյուր խմբում առաջին տեղը զբաղեցրած մասնակիցը եզրափակչի մասնակցության  ուղեգրի համար պայքարելու հնարավորություն է ստանում:

«Հիմա արդեն ուշ է Հայաստանի օգտին քվեարկելու համար: Chalange-ի արդյունքները հրապարակվել են: Առաջին փուլից անցավ 20 աղջիկ, այնուհետև 10-ը, որոնցից էլ կընտրվեն եզրափակչի մասնակիցներ: Սպասելիքս ավելին էր, որպեսզի Հայաստանի օգտին քվեարկեին, բայց չեն հետևում, շատ կարևորություն չեն դարձնում: Մենք անցանք «Թոփ մոդելի» մրցույթը, այնտեղից էլ մեկ աղջիկ պետք է ընտրվեր և դա եղավ ֆրանսիայի ներկայացուցիչը: Ունեինք սպորտի մցրույթ, որում հաղթող ճանաչվեց Ամերիկան ներկայացնող գեղեցկուհին: Դա բավականին դժվար մրցույթ էր՝ մեկ օրվա ընթացքում շատ տարբեր փուլեր անցանք: Կար նաև տաղանդի մրցույթ, ես դրան չէի մասնակցել, քանի որ միայն երգել, պարել և նվագել պետք է լիներ տաղանդը, իսկ ես նկարչուհի եմ, բայց թույլ չտվեցին այդ տաղանդով մասնակցել»,-պատմեց Արենան:

Նա նշեց, որ իր տպավորությամբ մրցույթում ոչ այնքան կարևորվում է մասնակիցների արտաքին տեսքը, գեղեցկությունը, որքան այն երկրի գործոնը, որը ներկայացնում ես. «Երկիրը շատ կարևոր է: Ընդհանրապես կարող եմ ասել, որ տեսքին չեն նայում: Ավելի շատ դիտարկում են, թե դու որ երկրի ներկայացուցիչն ես, քան փաստը, թե որքանով ես գեղեցիկ՝ չնայած, որ սա գեղեցկության մրցույթ է»:

Այդուհանդերձ, Արենան դեռ ակնկալիքներ ունի մրցույթի եզրափակիչ փուլից և չի բացառում, որ կարող է ժյուրիի քվեարկության արդյունքում հայտնվել է 30-ի մեջ: Անդրադառնալով մրցույթի նախապատրաստական աշխատանքներին` նա նկատեց, որ բավականին հագեցած ու խիտ գրաֆիկ ունեն և ամենօրյա երկարատև փորձեր են անցկացնում մինչև եզրափակիչը:

«Շաբաթվա մեջ մոտավորապես չորս, հինգ օր պատրաստվում ենք, մասնակցում բեմական փորձերի՝ շարժուձև, քայլվածք, պար: Ամեն առավոտ ժամը 6-ին արթնանում ենք և մինչև ուշ գիշեր ակտիվ պարապում ենք: Այստեղ շատ պրոֆեսիոնալ թիմ է աշխատում և իրենք ամեն բան անում են, որպեսզի հիանալի կերպով կայացնեն «Միսս աշխարհ 2018» -ը»,-եզրափակեց նա: