«Այս դերի միջոցով կատարեցի մայրիկիս երազանքը». Հասմիկ Դանիելյանը՝ «Ծղրիդի երգը» նոր հեռուստանովելում ներկայանալու մասին

Նոյեմբերի 26-ից Առաջին ալիքի եթերում կմեկնարկի 32 մասից բաղկացած  «Ծղրիդի երգը» հեռուստանովելը, որում գլխավոր հերոսուհուն մարմնավորում է դերասանուհի Հասմիկ Դանիելյանը: Tert.am Life-ի հետ զրույցում դերասանուհին պատմել է իր նոր կերպարի, հեռուստանովելի սյուժեի և ստեղծագործական թիմի հետ աշխատանքի մասին:

Հեռուստանովելի ռեժիսորը Գրիգ Վահրամյանն է: Հասմիկը նշեց, որ նոր հեռուստանովելում ներկայացված են կյանքից վերցված դրվագներ, նկարագրվում են մարդկային հարաբերությունները, սերը, ուսանողական կյանքը, անդրադարձ կա նաև ապրիլյան քառօրյա պատերազմին, որին մասնակից են դառնում գլխավոր հերոսն ու իր հայրը: Հասմիկը մարմնավորում է գլխավոր հերոսի՝ Արամի սիրած աղջկան, որի անունը Էմմա է:

«Գլխավոր հերոսը՝ Արամը, որն իր ընտանիքի հետ գյուղում է ապրում, գալիս է քաղաք սովորելու նպատակով: Իմ հերոսուհու՝ Էմմայի հետ նրանք պատահական հանդիպում են փողոցում և իրենց միջև ծագում է սեր առաջին հայացքից: Չնայած այն հանգամանքին, որ Արամը գյուղում ընկերուհի ունի, նա սիրային հարաբերություններ է սկսում Էմմայի հետ: Ավելի ուշ իրենք պարզում են, որ վաղուց են ճանաչում միմյանց ընտանիքներով: Քանի որ, փոքր տարիքում են շփվել միմյանց հետ, այդ մասին երկուսն էլ չեն հիշում: Նրանք ուսանողներ են, տղան՝ մաթեմատիկոս է, իսկ աղջիկը՝ Բժշկական համալսարանի ուսանողուհի»,-պատմեց Հասմիկը:

Նա նկատեց, որ թեև Արամի դերակատար՝ Դավիթ Գասպարյանի հետ առաջին անգամ է խաղում, սակայն դա իրենց չի խանգարել, որպեսզի հնարավորինս լավ ներկայանան սիրային զույգի դերում. «Դավիթը Սունդուկյանի թատրոնի դերասան է: Շատ ուրախ եմ, որ աշխատում եմ թատրոնի դերասանների հետ, որովհետև իրենք շատ ավելի լուրջ են մոտենում գործին: Մինչև նկարահանումները, բնականաբար, փորձեր ունեցել ենք, բայց պետք է նշեմ, որ նկարահանման հրապարակում շատ հանդարտ ու հաճելի մթնոլորտ է և այնպիսի տպավորւթյուն է, որ բոլորս միմյանց վաղուց ճանաչում ենք: Շատ լավ կազմ է հավաքված թե՛ դերասանական, թե՛ ստեղծագործական, ինչի շնորհիվ աշխատանքը հեշտ է ստացվում»:

Դերասանուհու խոսքով, իր հեռուստատեսային նոր դերը բավականին տարբերվում է նախորդ կերպարներից: Հասմիկը նշեց, որ իր հերոսուհու հետ նմանություններ չունեն, սակայն այս կերպարի միջոցով ինքը կարողացել է կատարել մայրիկի վաղեմի երազանքը. «Մի գաղտնիք բացեմ: Մայրիկս միշտ երազել է, որ ես բժշկուհի դառնամ և ես շատ մեծ սիրով եմ մարմնավորում այս կերպարը, քանի որ հերոսուհիս բժշկուհի է դառնում: Կարելի է ասել, սա ինչ-որ չափով հնարավորություն տվեց մայրիկիս երազանքը կատարելու և այդ առումով ինձ համար պատասխանատվությունն ավելի մեծ է: Ընդհանուր առմամբ կերպարս ինձ շատ է դուր եկել: Էմման նպատակասլաց, սովորող աղջիկ է, որը շատ հստակ է իր որոշումների ու ցանկությունների մեջ»,-եզրափակեց դերասանուհին: