«Չեմ զգում, որ Հայկն ինձանից մեծ է». «Կարմիր բլուրի» Սոսեն` իրենց սիրո պատմության, տարիքային տարբերության և սպասվող ամուսնության մասին

 

Երիտասարդ դերասանուհի Տիրուհի Հակոբյանին լսարանը ճանաչեց «Կարմիր բլուր» հեռուստասերիալով` Սոսեի կերպարով։ 23-ամյա դերասանուհին նշանված է։ Սիրելին` Հայկ Առաքելյանը, նրանից մեծ է 10 տարով, սակայն դա նրանց չի խանգարում։ Տիրուհին Tert.am Life–ի հետ խոսել է իրենց սիրո պատմության, տարիքային տարբերության, հարաբերությունների և սպասվող ամուսնության մասին։

 

Հարաբերությունների սկիզբը

 

Տիրուհին և Հայկը նույն բակից են, սակայն շփում, որպես այդպիսին, չեն ունեցել, քանի որ տարիքային տարբեր խմբերից են։ Նրանց առաջին ծանոթությունը եղել է տարիներ առաջ, իսկ շփումը սկսվել է 2016–ից։

 

«Երբեք մտքովս չի անցել, որ մեր միջև կարող է ինչ-որ բան սկսվել։ Հայկն իմ մեծ քրոջ ընկերներից էր։ Փոքր էի, երբ քույրս ծանոթացրեց մեզ, երևի, այդտեղից էլ ամեն ինչ սկսվեց, թեև այդ ժամանակ ոչ իմ, ոչ էլ իր կողմից զգացմունք չկար։ 2016-ի աշնանը նորից ընդհանուր հանդիպում եղավ, սկսեցինք շփվել ու սիրահարվել։ Քանի որ մոտ էինք ապրում, այնպես էր ստացվում, որ ամեն օր տեսնվում էինք։ Մեր պատուհանն ուղիղ նայում էր իրենց պատուհանին, երբեմն պատուհանից պատուհան էինք շփվում` մնջախաղով։ Այդպես էլ մտերմացանք, հետո մտերմությունը վերածվեց սիրո։ Նա իմ սիրտը գրավեց իր նրբանկատությամբ»,– պատմեց Տիրուհին։

 

 

Սիրո խոստովանությունը

 

Հայկն իր սիրո խոստովանությունն արել է օնլայն հարթակում` սիրելիին ստիպելով 30 րոպե լսել իր սրտի խոսքը։ «Whatsapp–ով ձայնային հաղորդագրություն ստացա, տևողությունը 30 րոպե էր։ Այդպես 30 րոպե լսում էի իր խոստովանությունը։ Ես սպասում էի նման խոստովանության։ Երբ լսեցի այն, մտքումս ասացի` ահա՜:),– հիշեց երիտասարդ դերասանուհին, որն իր խոստովանությունն ավելի ուշ է եղել։ –Չեմ հիշում, թե երբ եմ արել իմ սիրո խոստովանությունը, բայց հաստատ ավելի ուշ էր։ Կարծում եմ` իր հետ շփումը պահելով արդեն իսկ ցույց էի տալիս, որ ես էլ անտարբեր չեմ»։

 

Տիրուհին փորձեց Հայկից  պարզել, թե երբ է առաջին անգամ սեր խոստովանել նրան, սակայն սիրելին ևս չմտաբերեց։

 

Տարիքային տարբերության ազդեցությունը

 

Տիրուհին վստահեցնում է` տարիքային տարբերությունը որևէ կերպ չի ազդում իրենց հարաբերությունների վրա։ «Ես չեմ զգում, որ նա ինձանից մեծ է, հետաքրքրությունների տարբերություններ չունենք։ Գուցե, ուրիշները 33 տարեկանում այդքան ակտիվ չլինեն, սակայն ինքը, կարծես, իմ տարիքի լինի։ Ես մեզ համարում եմ կյանքով լի զույգ։ Հայկի` ինձանից մեծ լինելը կարող եմ զգալ միայն ավելի ճիշտ խորհուրդներ ստանալով, բայց նա չի փորձում ինձ ավելի հասուն դարձնել, փոխել։ Սիրում է ինձ այնպիսին, ինչպիսին կամ։ Երբեմն, կարող եմ երեխայություններ անել։ Օրինակ` շատ ցրված եմ, կարող է հեռախոսս կամ անձնագիրս մոռանամ ինչ–որ տեղ, ուտելիս թափեմ կողքերս, բայց նա դրան ժպիտով է վերաբերում։ Ուղղակի ուշադիր է, որ իրերս ինչ–որ տեղ չմոռանամ։ Միայն այդ դեպքերում է զգացվում իմ երեխայությունն ու իր հետևողական լինելը»,– ասաց դերասանուհին։

 

 

Ամենառոմանտիկ քայլերը

 

Իր ամենառոմանտիկ քայլը Տիրուհին արել է Հայկի տարեդարձի օրը. «Ծննդյան նախորդ օրը Հայկը գերծանրաբեռնված էր աշխատանքով, նույնիսկ մոռացել էր, որ գիշերն իր ծնունդն է։ Աշխատանքից հոգնած եկավ, 11։40–ի կողմերն էր, զանգեց, ասաց, իջիր բակ, մի քիչ քայլենք։ Մոտենում էր կեսգիշերը, առաջարկեցի բարձրանալ իրենց տուն, սուրճ պատրաստեմ իր համար։ Բարձրացանք վերև, մտավ իր սենյակ ու տեսավ, որ այն ամբողջությամբ զարդարված է իր սիրելի գույնի փուչիկներով, մեր լուսանկարներով, արդեն մեր տանը մեզ էին սպասում իր ընկերներն ու սիրելի մարդիկ»։

 

Իր հերթին` Հայկը սիրելիին գեղեցիկ անակնկալ է մատուցել Վալենտինի օրը։ Տիրուհու համար անսպասելի ու հաճելի է եղել ստանալ Դուբայի ուղևորության տոմսեր։ «Իր կողմից դա ամենառոմանտիկ քայլն էր։ Դուբայում հրաշալի ու անմոռանալի օրեր անցկացրինք»,– նկատեց նա։

 

Աշխատանքը և սերը

 

Հայկը փոքր բիզնես ունի, զբաղվում է տրիկոտաժի արտադրությամբ։ Տիրուհին հայտնեց, որ  երբեմն, գնում է արտադրամաս, օգնում սիրելիին։ Իր հերթին` Հայկն էլ Տիրուհուն է շատ աջակցում։ Ամենուր ուղեկցում է Տիրուհուն, երբ նա նկարահանումների է լինում, համբերատար սպասում է նրան հարևան սենյակում` առանց տրտնջալու, որ Տիրուհին նկարահանվում է մինչև ուշ գիշեր։

 

Նա նկատեց, որ սիրելին շատ ուշադիր է իր հանդեպ, ինքն է նրա հանդեպ է նույնքան ուշադիր ու հոգատար։ Տիրուհին կարևորում է սերն ու վստահությունը, որ առկա են իրենց հարաբերություններում և կարծում է` հետագայում էլ խնդիրներ չեն առաջանա։ «Եթե սկզբում կարող է լարվեր, որ ուշ եմ ավարտում աշխատանքս, միշտ կողքիս լիներ, մտածեր` հանկարծ ինչ–որ վատ բան չլինի, հիմա  ավելի հանգիստ է։ Հիմա էլ է ինձ հետ, բայց  ժամանակի հետ բոլորին ճանաչելով ավելի հանգիստ է վերաբերում աշխատանքիս»,– ասաց դերասանուհին, որն ազատ ժամանակը փորձում է նվիրել սիրելիին, որպեսզի զբաղվածության պատճառով հարաբերությունները չտուժեն։

 

 

Վեճեր

 

Դերասանուհին վստահեցնում է` իրենք լուրջ վեճեր չեն ունենում, իսկ փոքրիկ վեճերը հիմնականում ինքն է  հրահրում։) «Հիմնականում ես եմ լինում նեղացողը։ Հնարավոր է ինչ–որ բան ասեմ, Հայկը չհասկանա` հարցիս իմաստը, ես նեղանամ, որ չի հասկացել։ Բայց այդ նեղանալը մի քանի րոպե է տևում, անմիջապես գրկում է ինձ ու ամեն բան  հարթվում է։ Մոտ 2 տարի է` միասին ենք, 1-2 անգամ է եղել, որ նա նեղանա։ Ես էլ նույն կերպ եմ սիրաշահել իրեն` գրկել եմ ու ամեն ինչ մոռացել ենք»,– պատմեց նա։

 

Սիրո տնակի կառուցումը

 

Զույգի ամուսնությունը սարերի հետևում չէ։ Հստակ ժամկետ նշել Տիրուհին դժվարանում է, ասում է`, ամենայն հավանականությամբ, իրենց ամուսնությունը կկայանա հաջորդ ամռանը։ «Հիմա մենք կառուցում ենք մեր սիրո տնակը։ Որոշել ենք երկուսով ապրել։ Ամուսնության ժամկետը մեծապես կախված է շինարարության ընթացքից»,– ասաց նա։